आच्छे दिन किसके

आच्छे दिन किसके
आच्छे दिन किसे और के म्हारा मुश्किल पेट भरणा देखो ॥
या  बी जे पी बी देख लई कांग्रेस तैं भी भुण्डा खरणा देखो ॥
हरयाणा के खेताँ मैं या हरित क्रांति ल्याई किसनै देखो
माट्टी गेल्याँ माट्टी हो करकै फसल उगाई किसनै देखो
फ्लाई ओवर बणा करकै सड़क चमकाई किसनै देखो
खेलां मैं हरयाणा की या पहचान  बनाई किसनै देखो
फेर बी मजदूर किसान का क्यों तड़फ तड़फ कै मरणा देखो ॥
मजदूरां नै नहीं ठिकाना गरीब दिहाड़ी टोहते फिरते
किसानां के सिर कर्जा बधग्या  खाकै रोजाना मरते
पढ़े लिखे नौजवान चाल मैं  सरमाये दारां की फंसते
सट्टे बाज प्रॉपर्टी डीलर आज म्हारे पै फब्ती कसते
हम तो समझे कोन्या इनका हाँ भरकै नै फिरणा देखो ॥
बिदेशी पूंजी की करती ये दोनों पार्टी ताबेदारी देखो
अडानी  और अम्बानी की भाई बणी ये महतारी देखो
भय  मुक्त हरयाणा मैं करैं औरतां साथ दुराचारी देखो
असुरक्षा इतनी बढ़ी आज सरकार की खुमारी देखो
मँहगाई बेरोजगारी का नहीं दीखता कोए सरणा देखो ॥
नंबर वन हरयाणा का आज खुबै शोर मचा राख्या सै
लूट खसोट मैं सबतैं आगै यो प्रदेश पहोंचा राख्या सै
मारुती वर्कर जेल मैं गेरे कसूता जुल्म ढ़ा राख्या सै
झूठे वायदे दिखावटी मुखौटे यो चेहरा छिपा राख्या सै
किसान मजदूर को सम्मान चाहिए जरूरी मिलणा देखो ॥